"Gure iritziz, molde berri bati ateak irekitzen dizkio akordio honek; alde guztiek ahalegina egin dute soluzioak topatzeko eta, gure iritziz, salbuespen legedi eta politiken aroaren amaierari ekiteko", gaineratu dute. Oso garrantzitsutzat jo dute alde guztiak asebetetzen dituen akordioa erdietsi izana eta, zentzu horretan, akordioa erdiesteko alde guztiek eta Auzitegiak berak eginiko ahalegina aitortu dute.
Espero dute formula hau baliagarria suertatzea gatazkaren ondorioen gaindipenari begira: "Iragan urtarrilaren 9ko Bilbo eta Baionako mobilizazioek espetxe politikaren aldaketaren aldeko jendarte anitz mobilizatu bat islatu dute. Ipar Euskal Herriko indar politiko guztietako ordezkarien parte-hartzeak, ETAren biktimek euskal preso politikoen eskubideen aldeko pankartan egon izanak edota atzo sinaturiko akordioak erakusten dute borondatea izan ezkero akordioa posible dela eta badagoela modu posible bat biktimen arloan zein presoen etxeratzean ditugun erronkei soluzioa emateko".
Horiek esanda, prozedura guztia "jazarpen politiko hutsa" izan dela errepikatu dute, hamar urtean "kostu humano handia" izan duela eta hori ez dutela berreskuratuko. "Edozein kasutan, gure jardun politikoak indarkeriarik gabeko bake agertoki baten eraikuntza izan du helburu eta, zentzu horretan, edozein helburu politiko erdiesteko bide politiko eta demokratikoen aldeko hautua berresten dugu", gehitu dute.