Neska talde batek Aretxabaletako futbol taldeko zuzendaritza batzordera jo zuen, areto futboleko talde bat sortzeko helburuarekin, eta momentuz erantzuna ona izan da. Batez ere, aurretik futbolean aritu diren emakumeak bildu ziren, aurreneko entrenamendu bat burutzeko asmoarekin.
Denboraldi honetan ezin izango dute txapelketetan parte hartu, baina orain helburu nagusia datorren denboraldirako motorrak berotzen joatea izango da. Irailean 2016-2017 denboraldia hasiko da, eta orain jendea batzea da asmoa.
Futbolean jokatu nahi duten neskak oraindik taldea antolatzeko eta eratzeko animatu ahal izango dira, eta horretarako UDArekin kontaktuan jarri besterik ez dute egin behar.
