Pilotalekua besteko mosaiko koloretsua 'Libre' aldarrikatzeko

Bergarako pilotalekua jendez bete da 35/02 eta 04/08 auziak salatzeko, eta auziperatuei babesa adierazteko: "politika egitearren zigortu nahi gaitu Espainiak, eta halako ekimen polit batekin erantzungo diegu", adierazi du aurkezle lanetan ibili den Maddi Iñarrak saioaren hasieran. Auziperatuak frontoiko kantxa aurrera gonbidatuta hasi dute ekitaldia.

 Jai bat antolatzea zuten helburu, eta osagai guztiak izan ditu: musika, dantzak, kantuak (frontoi dena jarri dute bertsotan) eta pilota partiduak -zer besterik, pilotalekuan egonda-. Eta harmailak jendez beteta, Arrano tabernari, Artats elkarteri, Aittor Arantzabali, Mikel Zubimendiri, Mikel Garaiondori eta Ino Galparsorori babesa adierazteko.
 
" 35/02 eta 08/04 auzia izen zatar horren atzean 35 lagun gaude, eta 10 urteko kartzela zigorra eskatzen digute, hain zuzen, halako ekitaldietan parte hartzearren, kale agerraldietan egotearren, prentsaurrekoetan parte hartzearren, politika egitearren, azken batean. Eta tarteren baten barre egiteko kapaz izan bagara ere, oso prozesu gogorra izaten ari da", adierazi du mikrofono aurrean Aittor Aranzabalek. Eta, herritarrei, eta 'Libre' ekimeneko antolatzaileei eskerrak eman die, halako ekitaldia antolatu eta bertan parte hartzearren. 
 

"Halako epaiketa eta sententzia politikorik" onartzen ez dutela adierazi du, eta hauteskunde hauetan herri honek baduela zeresana gaineratu du.

Hala, mosaiko koloretsu erraldoi bat osatuta amaitu dute saioaren lehen zatia.

Pilota partiduak ondoren 

Ekitaldiaren lehen zatiaren ostean, pilota partiduak jokatu dituzte frontoian: Arranoko txapelketako finala, Biritxi eta Igartua aurrez aurre; nesken partidua, Atorrasagasti-Ruiz Arizabaleta-Madariagaren kontra; eta Mikel Goñi jokoan ikusteko aukera ondoren, Beñat Iñarra lagun, Eneko Mugurutza eta Aritz Rezustaren kontra. 

Partiduen ostean, kalejira egingo dute erraldoi, buruhandi, trikitilari, hankapalo, batukada eta abarrekin –amaiera Arranon–. 22:30ean, berriz, kontzertuak egongo dira gaztetxean: Anger, Montauk eta DJ Naken Selektor.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.