Pilotuak 09:30ean hasi dira lanean. Zigorrolan hasi eta banan-banan joan dira lehen tramu hasierara, denbora galdu barik. Hala, tramu kronometratuetan topera beherantz –lehenengo biak buruz ezagutzen zituzten gehienek–, eta behin erlojua geratuta, hurrengo tramurako bidea ahalik eta azkarren egiten saiatu, indarrak neurtuta, hori bai: "Ikustekoa da jaisten zenbat energia erretzen den, leher eginda iristen zara behera. Eta ia errekuperatu barik, goranzko bidea hartu behar", zioen lasterketan lehenengoz parte hartu duen lasterkari batek.
Hirugarren eta laugarren tramuak, ostera, azkenera arte sekretupean izan dituzte antolatzaileek, eta rider gehienek hor gozatu dute gehien.
Hala, Markel Uriartek 16:58 minutuan bete ditu lau tramuak, eta atzetik zuen Jose Antonio Diezi 34 segundoko tartea atera dio. Borja Marron, podiuma bete duen hirugarren laguna, berriz, 2 minutura geratu da.
Txomin de Vega, Master 30ean nagusi
Lasterketako beste gizon azkarretako bat Txomin de Vega elgetarra izan da, master 30 kategorian lehenengoa (17:51), eta elitean parte hartu izan balu podiumera igoko litzatekeen pilotua. Eta aipatzekoa, baita ere, 23 urtez azpikoen maila, podiumera igo diren hiru lagunak ibarrekoak direlako: Adrian Jurado izan da azkarrena, Julen Axpe bigarren, eta Beñat Burgi hirugarren.
Ikusle asko lasterketa jarraitzen
Kirol hitzordu borobila izan da enduroko lehenengo lasterketa. Asier Rosado eta Koldo Arana antolatzaileek zorion mordoa batu dituzte, eta agindu dute datorren urtean bigarren edizioa egingo dutela: "Eta nobedade eta sorpresa gehiagorekin. Gu ere oso pozik geratu gara lasterketak eman duenaz, eta batez ere jende asko etorri izanak poztu gaitu".
Bihar, astelehena, Harmailatik saioak (22:00) lasterketaren laburpen zabala jasoko du.