Programari dagokionez, enpleguaren, etxebizitzaren, babes sozialaren, mugikortasunaren, ingurumenaren, euskararen, aisialdiaren eta parte hartzearen alorretan landuko dituzten ardatz nagusiak azaldu ditu Barberenak eta era berean, azaldu du burujabetza, eraldaketa soziala eta bakea direla koalizio ezkertiar eta abertzalearen azken helburuak: "Baina hori egunez egun eraikitzen jarraitzea da gure konpromisoa, kaletik bezala udaletik, Mankomunitatetik eta Foru Aldunditik. Bidea herritarrekin batera egingo dugu, gainerako alderdi zein eragile sozioekonomikoekin elkarrizketa eta elkarlanerako saiakera iraunkorra egiten".
"Demokrazia parte hartzailea eta erabakitzailea"
Agurne Barrusok legealdi berrirako erronka berri bat ere izan du hizpide: "Herritarrendako gobernatzen hasi ginen, herritarrekin gobernatzen jarraitu dugu eta herritarrak gobernu izatea lortu nahi dugu. Demokrazia parte hartzaile eta erabakitzailea lortzea da gure erronka nagusietakoa".
Izan ere, herritarren ahotsari garrantzia berezia eman diotela azpimarratu du Barrusok: "Gure programak eta hautagaitzak prestatu ditugunean hori egin dugu, herritarrei entzun eta euren proposamenak programa eta hautagai bilakatu".
