Urteroko ohiturari jarraituz, Dorletako Amaren Santutegian aurkeztu ditu Dorletako Ama txirrindularitza taldeak denboraldi berrian korrituko duten taldeak. Lehenengo Santutegi barruan eta gero kanpoan, talde argazkiak atera dituzte eta ondoren mokadutxoa ere egin dute.
Eskoritzako, Aretxabaletako, Aramaioko, Antzuolako eta Arrasateko txirrindulariak izango dira aurten taldean. Benjaminen, alebinen eta infantilen taldeez eta BTTn lehiatzen diren txirrindulariez gain, aurten talde berri bat izango du Dorletako Amak: kadeteena. Sei txirrindularik osatzen dute taldea: "Nagusitzen ari diren seinale da: aurretik ere gure txirrindulariak izandakoak dira. Jarraitu egin dute behintzat", azaldu du Junkal Perez zuzendaritzako kideak. Raul Blazquez izango da euren entrenatzailea: "Talde polita da, eta gogoz ikusten ditut. Oraindik ere badute ikasteko, baina denboraldi hasieran gaude, eta denboraldi polita dute aurretik".
Orokorrean dagoen mailaz galdetuta, gustura agertu da Junkal Perez: "Txirrindulari berri dezente hasi dira, eta aurretik datozenak apurka apurka ari dira martxa hartzen. Ikusiko dugu zer dakarren denboraldi berriak".
