Azken hilabeteotan egoera zaila bizi du Ziburuko Kaskarotenea ikastolak, prefeturak egun diharduen tokitik kanporatu nahi dituelako bertako ikasle eta irakasleak. Hainbat aldarrikapen eta kexaren ostean ere, egoerak ez du onera egin, auzapezarekin hitzordurik lotu ezean, ezin baitute irtenbiderik adostu.
Gauzak horrela, Kaskarotenearen alde egiteko kros solidarioa antolatu dute bailarako ikastolek azaroaren 28rako. Hala, Eskoriatza, Aretxabaleta, Arrasate, Bergara eta Oñatiko herriek, indarrak batu eta egun osoko egitarau propioa prestatu dute. Ikastoletako 4.300 ikasle arituko dira korrika goizean, eta arratsaldean, edonorentzat zabalik, tailerrak, karaokea, bertsolariak, dantzariak… izango dira.
Izen emate solidarioa
Kros solidarioan izena eman nahi dutenek dortsala jaso beharko dute herriko plazan, eta izen emateak euro bateko prezio sinbolikoa izango du. Ibilbidea ere edonork egiteko modukoa izango da, adin guztietara egokitua.
