Ukrainatik hamabost ume eta Saharatik bost etorri dira Debagoienera. Oñatira, adibidez, Ukrainako zazpi ume etorri dira, bi lehendabiziko aldiz, eta harrera familiei dagokienez ere, bi berriak dira. Abuztuaren 23ra arte egongo dira hemen, eta momentuz, gustura daude gaztetxoak.
Bi hilabete hauetan indarrak hartzea izaten da helburua. Medikuarenera eramaten dituzte eta gaztetxoen hainbat asmo dituzte udara honetarako: lagunekin jolastu, hemengo familiekin egon, igerilekura joan...
Harreman berezia sortzen da Ukrainako gaztetxoen eta bertako familien artean. Urte guztian zehar mantentzen dute harremana eta hemengo gurasoek dagoeneko familiakotzat dituzte umeak. Gaztetxoak, nola ez, oso gustura egoten dira hemengo familiekin.
Debagoienera iristen azkenak Oñatira etorri diren Ukrainiako haurrak izan dira. Euren aurretik heldu ziren Sahara eta Ukrainiako beste ume batzuk. Banoia Txernobilekin taldearen bitartez etortzen dira Oñatira Ukrainiatik umeak.
Bestalde, Chernobil elkartearen bitartez ere etorri dira bailarara Ukrainako neska-mutikoak: Aramaiora hiru, Eskoriatzara bat, Aretxabaletara bat, Bergarara bi eta Arrasatera bat. Guztira 233 haur ekarri dituzte, beste batzuetan baino gutxiago. Krisiak eragina izan du elkartetik uste dutenez.
Saharatik ere etorri dira bailarara umeak. Guztira bost; Arrasatera, Bergarara, Aretxabaletara, Eskoriatzara eta Aramaiora bana. Oporrak bakean egitasmoaren bitartez 400 etorri dira Euskal Herrira.