1995. urtean iritsi zen Mari Carmen Lazkano eibartarra Debabarreneko industrialdera, eta Deba bailararako jauzia egin du orain. Perfil teknikoa du, eta bere ahaleginak enpresa txiki eta ertainak erakartzera bideratuko ditu, Debagoienean batez ere.
Deustuko unibertsitatean enpresagintza ikasi eta gero, bere ibilbide gehiena enpresak bultzatzera bideratu du. Ia 20 urte hauetan tekniko lanak egin ditu, eta gerente postu hau bere lanari egindako errekonozimendu bat bezala hartu du.
Deba bailara osoko industrialdea kudeatuko duen arren, esfortzu handiena Debagoienean jarriko duela aipatu du Lazkanok, gurean baitaude lokal huts gehienak. Industrialdeko lokalen erabilpen anitzak aipatzeaz gain, horien kokaleku eta eskaintza zabala ere azpimarratu ditu gerente berriak. Enpresa eta ekintzaile gehiago erakartzeko, gainera, finantzaketa baldintzak hobetu dituzte lokalak errentan hartzeko edo erosteko aukera gehiago emanez.
