Bi talde gonbidatu izango dira lehen saioan. Rock and roll-a lantzen duen Donostiako talde batekoak izango dira, batetik: Niña Coyote eta Chico Tornado taldekoak, hain zuzen. Koldo Soret gitarra jotzaile eta ahotsak eta Ursula Strong bateria jotzaileak osatzen dute bikotea eta 2013. urtean kaleratu zuten euren lehenengo lana.
Horiek ezagutu ostean, Arratiako bost gaztek osatutako talde baten txanda izango da: Eskean Kristö. 2013. urteko maketa lehiaketa irabazi zuen taldeak eta bost abestiz osatutako lehenengo maketa grabatu zuen orduan. 70. hamarkadako rock and roll-a dute ardatz.
Pixkanaka-pixkanaka talde gehiago ezagutuko ditugu 7 akorde saio berrian. Zazpi saio izango dira, orotara.
Eguaztenetan, 22:00etan eta 00:20ean, ikusi ahal izango da saioa; eta eguenetan, 15:00etan eta 19:00etan.