Liburuaren Nazioarteko Eguna da gaur; 1996tik ospatzen da gaurko egunez. Literatura eta irakurketa sustatzeko eguna da hau, liburuak kalera atera, eta barruan duten fantasia munduari zabaltzeko data. Aurten baina, oporrengatik, liburutegi gehienek egun hau ospatzeko egitarauak aurreratu egin dituzte. Hala ere, oraindik bada zer ospatu.
Amaia antzokirako sarrerak
Liburuaren Nazioarteko Eguna ospatzeko, Amaia Antzokirako haur eta helduentzat 10 sarrera bikoitz zozketatuko dituzte Arrasateko Udal Bibliotekan. Apirilaren 14tik 30era, edozein herritarrek liburuak maileguan eramatean zozketarako txartela bat jasoko dute.
Marrazketa tailerra Oñatin
Ikastaroa astelehenean izango da helduen liburutegian 18:00etan. Ikastaro honetan, errotulagailu sinple batekin eta modu azkar, erraz eta eraginkor batean marrazten ikasteko ariketak egingo dira. Bertaratzen direnek, sintesi bisuala, kontzeptu abstraktuen ikonizazioa, azkartasuna eta trebetasuna landuko dituzte. Kontzeptu konplexuak diruditen arren, animatzen diren herritarrak oso modu errazean landuko dute marrazketa mota hau.
Dena den, egun hau ospatzeko modu onena liburuek euren baitan ezkutatzen dituzten abenturak irakurriaz da.
