ZTB Jardunaldiei hasiera eman diote Aroztegi aretoan azaroaren 15era arte ikusgai egongo den erakusketarekin. Enpresarek antolatutako erakusketak Bergarako industriaren iragana eta gaur egungo garrantzia ditu ardatz, eta herriko industria ondareari eta enpresei balioa ematen diote. Era berean, munduan zehar Bergarako enpresek izan duten eta duten eragina azpimarratzen da erakusketan.
Jardunaldiei hasiera emateko Bergarako alkate Gorka Artolak, Enpresareko zuzendari exekutibo Carla Añonek eta Gipuzkoako Foru Aldundiko Ekonomia Sustapeneko eta Proiektu Estrategikoetako foru diputatu Unai Anduezak hartu zuten hitza Aroztegi aretoan.
Artolak gogorarazi du ZTB Jardunaldiak “erreferentziazko gune bihurtu direla zientzia, teknologia eta berrikuntza herritarrengana hurbiltzeko, modu irisgarri eta parte-hartzailean”. Aurtengo edizioaren ardatza ikerketa da, eta alkatearen hitzetan, “emaitzak ez ezik, haien atzean dagoen bidea ere erakutsi nahi da: jakin- mina, hipotesiak, saiakerak eta, zergatik ez, akatsak ere”.
Añonek, erakusketaren harira, Bergarako enpresek nazioartean duten irismena goraipatu zuen: “Bergara bezalako herri batetik munduko edozein txokotara iristeko gai gara. Hemen fabrikatzen diren piezak eta produktuak mundu osora iristen dira”.
Unai Anduezak, bukatzeko, Zientzia, Teknologia eta Berrikuntzak Jardunaldiek "beste edizio bat izaten jarraitzearen garrantzia" aipatu zuen, Bergarako Udalak eta Laboratorium Museoak egiten duten lana nabarmenduz, eta "enpresek, aberastasunaz gain, herria ere sortzen" dutela azaldu zuen, erakusketaren tituluari aipamena eginez.