Miguel Okina margolari bergararra jaio zeneko mendeurrena ospatzeko, urte osoko egiataraua antolatu zuen, 2024ean eta 2025ean, Bergarako Artisten Elkarteak, Beart-ek. Ekitaldi-sorta oparoari amaiera emateko, Miguel Okina 1924-2021. Artea etxeetara iritsi zenekoa liburua aurkeztu zuten iazko irailean udaletxeko areto nagusian.
Liburua xubi.eus webgunean jarri du egileak, Elkoroberezibarrek, orain. Eta liburuarekin batera, Bergara, pintore herria izenburuko testua. Hain justu ere, Okinaren liburuaren aurkezpenean Elkoroberezibarrek berak eman zuen hitzaldia du oinarri testuak eta azkeneko 250 urteetan margolanek eta artista plastikoek Bergaran izan duten garrantzia azpimarratzen du, "transmisioaren gakoak" azalduz.
Arte plastikoaren garrantzia
"Bergaran pinturari duintasuna dario, errespetuz tratatu izan da beti. Artista izatea erabakitzen duenak, etxekoen babesa ez ezik, herrikoen bultzada ere sentitu du urteetan zehar. Belaunaldiz belaunaldi, nork erakutsi eta non ikasi izan du zaletuak; eskolan, estudioetan, lagun artean, akademietan edo kalean" dio egileak testuaren sarreran. Eta, Bergaran, pintura eta pintoreak duintasunez eta errespetuz tratatu izanaren arrazoiak kontatzen ditu, herriko artista eta arte akademia edota irakasleen berri emanez.
Hala, esaterako, 1774an, Parisko doako Errege Eskolaren estatutuak eredutzat hartuta, Euskalerriaren Adiskideen Elkarteak Bergarako Doako Marrazketa Eskola sortu zuela kontatzen du; Peñafloridako kondea buru zuen Marrazketa Eskola hark.
Margolanekin erakusketak
Liburuarekin batera, Okinaren gaineko bi erakusketa antolatu zituen Beart elkarteak Aroztegi aretoan haren jaiotzaren mendeurrenaren harira: Zurian beltz izenekoa –Okinak ikatzez egindako 100 erretratu– iazko martxoan eta Miguel Okinaren erakusketa antologikoa izenekoa urte bereko urrian. Horretaz gain, artistaren lanak paretetan eskegita dauden herriko hainbat elkarte gastronomikotara bisitak ere antolatu zituen Beart-ek.
Xubi.eus webgunean batuta dauzka Miguel Angel Elkoroberezibarrek azken urte hauetan Bergarako historia, pertsonaia eta artisten gainean idatzitako hainbat argitalpen. Era berean, baita hainbat ikus-entzunezko edota argazki, Don Serafin Esnaolarenak, esaterako.