Bergarako gazteak kartzela zaharrean aske eta modu autogestionatuan antolatu daitezen sortu dute Ziega Gazte Asanblada. Uda aurretik antolatutako afari bat izan zen abiapuntua, eta ordutik San Martin jaietako txosnetako bazkaria eta urriaren 18ko Gazte Eguna antolatu dituzte.
Kontzertu-aretoa baino gehiago
Baina zergatik sortu zen izenetik hasita kartzela zaharrari erreferentzia egiten dion Ziega? Honela azaldu du Ziegako kide Auritz Loidik: "Bergarako gazteen artean kartzela zaharrarekiko atxikimendu falta handia zegoela nabari genuen, gazte askok ez zuten ikusten kartzela zaharra kontzertu-areto batetik harago. Bestalde, gazteen artean politikarekiko atxikimendua ere galbidean dagoelako, herriko gazteak kartzela zaharrera gerturatzeko aukera emango duen talde bat izan dadin sortu zen Ziega; finean, gazte asanbladek beste herrietan egiten duten lana egin nahi dugu".
Ezinegonetatik beharretara
Era berean, Ziegako kide Izar Kortabarriaren ustez, gaztetxeak gazteen ezinegonak partekatzeko eta beharrak asetzeko lekua izan behar du: "Politikoki gutxieneko ezinegon bat dugun gazteak elkartu gara. Ibilbide motza egin dugu, eta, helburuak eurak ere guztiz zehazteke baditugu ere, euskararen aldeko lana egingo dugu, inguruko gaztetxe eta espazio autogestionatuekin elkarlana sustatuko dugu, gaur egungo askotariko gizarte zapalkuntzen aurka jardungo dugu, azkenaldian hedatzen ari diren jarrera eta ideia erreakzionarioen aurka egingo dugu, denon eskura egongo diren egitarauak antolatuko ditugu eta herriko beste hainbat eragilerekin elkarlanean aritzea da gure asmoa. Hemendik aurrera etorriko dena bide-orriari jarraiki gauzatuko dugu".
Ziega zabalik, "parez pare"
Ziegan parte hartzeko ateak "parez pare zabalik" daudela gogoratu dute. "Ziegako parte izateko nahikoa da edozein asanbladatara joatea edo asanbladako edozein kiderekin harremanetan jartzea. Egun, 54 kide gaude Whatsapp taldean, eta horietatik 25 bat gara aktibo gaudenak. Bergarako gazteei Ziegara batzeko dei egin nahiko genieke; euren ezinegonak plazaratzeko espazio bikaina izan daiteke, edozein proposamen entzuteko gogotsu gaude eta kartzela zaharra berriz ere gazteon espazioa ere badela sentitzeko aukera paregabea da. Izan ere, Bergaran halako espazio bat izatea itzela da, aukera mordoa eskaintzen ditu, eta baliatu egin behar dugu", dio Loidik.
Asanblada batera joatea edo kide batengana jotzea nahikoa da Ziegan sartzeko
Urte erdi inguru dela abiatu zuten Ziega, eta, oraingoz, ez zaie ilusiorik eta gogorik falta. "Erabaki asko daude oraindik hartzeke; horretan dihardugu. Izan ere, gogotsu gaude hainbat ekintza antolatzeko, baina uste dugu orain pentsatzeko eta gure ideiak antolatzeko tarte bat hartu behar dugula. Horrek ez du esan nahi laster zerbait antolatuko ez dugunik", adierazi du Kortabarriak.
Hainbat lantalde sortu zituzten urriaren 18ko Gazte Egunerako; besteak beste, komunikazio-lantaldea, protokolokoa, egitaraukoa, sukaldekoa, txandetarakoa eta azpiegiturarena. Egun haren bueltan erabaki zuten, gainera, Ziegako kideak elkartzeko maiztasuna: "Gazte Egunaren ondoren erabaki genuen bi astean behin batzea, eguaztenean asanblada bat eta bi astera domeka baten beste bat. Kide asko unibertsitateko ikasleak dira, eta horregatik erabaki genuen bilera batzuk asteburuan egitea. Bestalde, asanblada bat bukatzen denean zehazten da nork dinamizatuko duen hurrengoa".