Euskararen normalizazioak eta biziberritzeak eskatzen duen hizkuntza politika berriaren inguruko gogoeta egin dute, euskararen bilakaera, egungo egoera eta etorkizuneko joerak mahai gainean jarriz, hasteko eta behin. Haur txikiak dituzten gurasoengandik eta gazteengandik jasotako informazioa partekatu du Olatz Altuna Soziolinguistika Klusterreko ikerlariak, eta ateratako ondorioez hitz egiterakoan, gaur egun gizarte eleaniztun batean bizi garela azpimarratu du.
Indarberritze aro bat irekitzeko beharra mahai-gaineratu du Josu Aztiria EH Bilduko legebiltzarkideak. Ildo horretatik, adierazi du datozen asteetan Enplegu Publikoko Legearen aldaketarekin Legebiltzarrean gertatzen denak garrantzia handia izango duela, aurrera begira adostasunean ekinbide berriak aurrera eramateko gai izango diren edo ez ikusten lagunduko duelako. Iñigo Urrutia, Euskal Herriko Unibertsitateko irakaslea, bestalde, euskararentzako estatus juridiko berri baten premiaz aritu da.
Egitasmo honen bidez, Telesforo Monzon eLab laborategian lantzen ari diren eta une honetan gako diren gai politiko, sozial eta juridikoen inguruan gogoeta partekatua sustatu nahi dute, ikuspegi soberanistatik abiatuta.