Hockeyak goitik behera hartu du Bergara aste bukaeran. Barikuan hasi eta zapatura arte, patinen eta sticken hotsa besterik ez da entzun Labegaraieta kiroldegian, Bergara Hirian emakumezkoen bost talde lehiatu dira-eta, nor baino nor gehiago. Barikuan 3x3ko partidak jokatu zituzten, eta zapatuan bost taldeen arteko neurketak.
Bergarako Burdinola taldeak ezin izan du lortu finalerako txartela zapatuan, eta nekea pilatuta –hiru norgehiagoka jarraian jokatu behar izan dituzte bergararrek sekulako beroarekin– 3. postua lortzeko partida, 4-0 galdu dute Zaragozako All Stars taldearen aurka.
Finala Valladolideko derbi bat izan da, bertako bi taldek jokatu dute-eta. CPL Valladolide eta Rolling Lemons lehiatu dira elkarren aurka, eta garaipena Espainiako talde onenetakoa den CPLk eskuratu du (11-2).
