"Arrakastarekin" egin dute hirugarren Ekinez musika jaialdia joan den asteburuan. "Kaleko doinuen elkargunea izateko asmoz eta gogoz sortutako jaialdiak bete du bere helburua; horregatik eskerrik beroenak lehen lerroan egon zareten boluntarioen sare guztiari", hala adierazi dute antolatzaileek sare sozialetan.
Hesiaren beste aldean izan diren musikariak eta ikusleak ere "gustura" ibili dira Labegaraieta auzoan atondutako topagunean; horren erakusle dira saio berezian batutako testigantzak. Musikaz haragoko bestelako ekimenek ere "harrera ona" izan dute; esaterako, estreinakoz prestatutako tatuatzeko guneak.