Udaberriko oporraldia amaitu eta berehala eman du Bergarako Udalak aurtengo udarako prestatu duen aisialdi eskaintzaren berri. Udaleku irekiak, kirol campusa, kirol eskaintza edo Laboratorium museoko eskaintza izan, ume eta nerabe bergararrek ez dute aspertzeko astirik izango ekainaren 23tik uztailaren 18ra. Udaleku irekietan maiatzaren 15era arte dago zabalik izen-ematea; kirol campuserako, maiatzaren 12ra arte; udako igeriketa kanpainarako, maiatzaren 6ra arte; eta, azkenik, Laboratorium museoaren jarduera bakoitzak bere izen-emate epea izango du.
