Bergaran, Oñatin, Arrasaten eta Antzuolan egindako elkarretaratzeetan Legebiltzarrera eraman gura den Herri Ekimen Legegilea aurkeztu dute. Bereziki emakume pentsiodunen diru-sarrerak hobetuko ditu HEL berriak. "EAEn, hiru pentsiodunetik batek LGStik beherako diru-sarrerak ditu, eta % 70 emakumeak dira; gehienek 850€ baino gutxiago irabazten dute hilean, eta kopuru hori ez da nahikoa duintasunez bizitzeko. Lan-diskriminazioak eta adingabeen eta mendeko senideen zaintza-lanetan aritzeak azaltzen dute zergatik dituzten emakume pentsiodunek diru-sarrera txikienak", jaso dute Legebiltzarreko prentsa-aretoan egindako aurkezpenean.
Pentsionista bakoitzak pertsona bakarreko unitate ekonomikotzat hartzeko eskubidea izatea ere planteatzen dute. "Pentsioen osagarria bizikidetza-unitatearen diru-sarrerek baldintzatzen dutenean, barne-desberdintasunik ez balego bezala, emakumea zigortu egiten da eta desagerrarazi beharreko sostengatzaile maskulinoa eta mendeko bikotea duen familiaren kontzeptua indartzen da".
Apirilaren 24ra arte
Beraz, sinadurak bilduko dituzte astelehenetan EAEko herrietan egiten diren 80 kontzentrazioetan. 18 urtetik gorako herritar guztiek dute Herri Ekimen Legegilea sinaduraz babesteko aukera.
Apirilaren 24ra arte jasoko dituzte sinadurak. Herri Ekimen Legegilea urriaren 30ean eramango dute Eusko Legebiltzarreko Mahaira.
Hitzaldia Bergaran
Bestalde, Herri Ekimen Legegileari buruzko xehetasun guztiak emateko hitzaldia egingo dute Bergarako Seminarixoan, hilaren 21ean. Jesus Soubies adituak egingo du berba, eta interesa duten herritar guztiendako hitzordua da.
