Udalarekin eta Beart Arte Taldearekin elkarlanean, Gabonetako kanpaina aurkeztu du Bergarako merkatari eta ostalarien elkarteak. Orain arteko erakusleiho lehiaketa alde batera utzita, "merkatarien arteko elkarlana sustatzen duen" lehiaketa bat jarri du martxan merkatarien elkarteak: Bedelkartxo. Udaleko zinegotzi Maite Usabiagak adierazi duenez, gainditu gura izan dute erakusleiho lehiaketak azken urteetan izan duen "partaidetza jaitsiera", eta "lankidetzan oinarritutako zerbait egitea" izan da asmoa, "herritarrei parte hartzeko formatu berri bat" eskainita.
Letren lehiaketa
Erakusleiho lehiaketa ordezkatzeko eta "herritarren eta denden arteko lankidetza sustatzeko" joko berri bat aurkeztu du Bedelkarrek. Hala, erakusleihoak "modu kolektiboan apainduko dira", eta horrez gain, Beart Arte Taldekoek sortu dituzten eta Bedelkartxo hitza osatzen duten hizkiak banaka eta txandaka kokatuko dira erakusleihoetan. Herritarrek "hizkiak aurkitu eta argazkiak atera" beharko dituzte, ostean Bedelkar elkartearen WhatsApp zenbakira bidaltzeko. Hizkien argazkiak bidaltzen dituztenen artean "zozketa bat" egingo da, eta "500 euro" banatuko dira. Lehiaketa abenduaren 9tik 29ra bitartean egingo da eta abenduaren 30ean, argazkiak bidali dituzten guztien artean lehiaketaren irabazleak ezagutuko dira.
Hurrengo sariak zozketatuko dira:
- 150 euroko sari bat Bedelkartxo hitza osatzen dutenen artean.
- 100 euroko sari bat Bedelkar hitza osatzen dutenen artean.
- 50 euroko 5 sari Elkar hitza osatzen dutenen artean.
Naiara Alonso Bedelkarreko kideak jakinarazi duenez, "elkarlanean oinarritutako ekimen bat" da aurtengoa; izan ere, "orain arte komertzio bakoitzak bere erakusleihoa soilik apaintzen zuen, eta orain amankomunagoa den zerbait sortu dugu. Herritarrek erakusleiho bat bozkatu beharrean, ahalik eta gehienak bisitatu beharko dituzte hizkiei argazkia ateratzeko". Lehiaketaz gain, Bedelkarreko dendetan gastatzeko 300 euroko bono bat eta 100 euroko 17 bono zozketatuko dituzte, abenduaren 9tik urtarrilaren 4ra bitartean Bedelkarreko saltokietan erosketa bat egiten dutenen artean. Gainera, abenduan Bedelkar txartelarekin egindako erosketekin 40 euro eskuratu ahal izango dira denda berean gastatzeko.
Beste hainbat ekintza
Urteroko legez, Beldelkarren hurrengo ekintzak antolatu ditu Gabonetarako:
- Txu-txu trena. Abenduaren 23tik 30era egongo da, 11:00etatik 13:00etara, eta 17:00etatik 20:30era.
- DJ Reibax. Abenduaren 23an eta 28an egingo du emanaldia herriko kaleetan, 18:30etik 21:30era.
