2024-2025eko denboraldiari begira Ipintza futbol zelaiak itxura berria izango du, astelehenean hasi ziren-eta instalazioak berritzeko lanekin. Udalak 230.000 euro bideratu ditu zelai artifizial berria jarri eta bestelako hobekuntza batzuk egitera. "Belar artifizial zaharra kendu zen eta orain ureztatze-sisteman probak egiten ari dira; horren ostean, belar artifizial berria jarriko dute. Belarra berritzeaz gain, zelai inguruko sarea eta ate guztiak berritu egingo dira. Behar handia zegoen belarra aldatzeko, gomendioa delako gehienez hamar urtez izatea, eta Ipintzakoak 15-16 urte zituen. Astelehenean hasi ziren lanak eta aurreikuspena da hilabete batean guztiak amaitzea", adierazi du Kirol zinegotzi Aitor Arantzabalek.
Gipuzkoako onenen artean
Hain zuzen ere, azpiko zoruaren planimetria zuzendu eta ura eramateko kanaleten sistema aldatu beharra dagoen edo ez probatzen ibili dira egun hauetan, eta beharra egongo balitz hura ere aldatu egingo dute. Gainerakoan, belarra ez ezik, ateak, inguruko sarea eta aspertsoreak ere berrituko dituzte.
Aldaketaren albistea pozik hartu dutenak BKEko futbol saileko kideak dira, eurak dira-eta Ipintzako eta Agorrosingo zelaien erabiltzaile nagusiak. Aldaketa "berandu samar" datorrela dioten arren, aurrera begira izango dituen onurekin pentsatzen jarrita daude, Iosu Elorza presidenteak zehaztu duenez: "Urteetako atzerapenarekin badator ere, pozik hartu dugu Udalaren erabakia; bereziki, Ipintzako belar artifizial zaharra pairatu duten neska-mutikoei begira. Izan ere, azken bi edo hiru urteetan egoera kaskarrean aritu dira entrenatzen, eta espero dugu aldaketa onuragarria izango dela gure jokalarien formakuntzarako eta bilakaerarako". Behin Ipintza berrituta, Elorzak dio Gipuzkoako instalazio onenetakoak izango dituztela: "Bi zelai izango ditugu ganorazkoak, belar onarekin, eta uste dugu klubaren harrobirako oso ona izango dela".
Hurrengo urratsa, aldagelak
Bi zelaiak berrituta, Elorzak gogora ekarri du aldagelak berritzea izan beharko litzatekeela hurrengo urratsa: "Agorrosin berrirako bigarren fasea noiz gauzatuko zain gaude. Gure asmoa bigarren fasea aurten hastea zen, baina Udalaren partetik ez dugu konfirmaziorik".
