Kirol zerbitzuko ikastaroetan eta euskaltegiko tasetan %3ko igoera aplikatzea onartu zuen udalbatzak atzo ezohiko izaeraz deitutako osoko bilkuran. Igoeraz gain, herriko ludoteka guztiak doakoak izatea ere onartu zen, eta ogasun zinegotzi Aitor Arantzabalen arabera, neurri horrek, besteak beste, herriko umeen aisialdiaren aukera berdintasunean sakontzea eragingo du. EH Bilduren eta EAJren aldeko botoekin eta alderdi sozialistaren kontrako botoarekin egin zuen aurrera proposamenak.
Indarrean dagoen azokako araudia, 1993koa
Bestalde, Oxirondo azokan Elikaenea proiektua martxan jarri ahal izateko ezinbestekoa den araudiaren aldaketa ere onartu zuen udalbatzak. Oposizioa abstenitu egin zen, nahiz eta EAJ hasieratik alde agertu den azokak biziberritzeko duen beharrarekin.
Ordenantza fiskalen aldaketa eta azokako araudi berria behin betiko onartuko dira datozen 30 egunetan herritarrek helegiterik ez badute aurkezten.
