Bergarako margolariek osatzen duten Beart taldeak kalera atera ditu kideek egindako margolanak eguerdian, herritarrei erakusteko. Hain zuzen ere pintura zaletasuna sustatzeko eta indartzeko sortu zuten Beart elkarteak eta gero eta bazkide gehiago ditu; ehun inguru dira egun. Margotzen ikasteko tailerrak ere eskaintzen dituzte, eta bete egiten dira taldeak.
Pinturaren teknika ezberdinak ere erakusten dizkiete. Saiatzen dira ekimen desberdinak egiten pintura herritarrengana heltzeko eta horietako bat da urtero kalean jarri ohi duten erakusketa. Elkartearen eguna ospatzeko egindako ekintza izan da, kideak elkarrekin bazkaltzera joan aurretik.
Nagusiak zein gaztetxoak joaten dira pintura eskolak jasotzera Bergaran; gazteak, adibidez, 70 bat, astero. Eta herritarrak, oro har, badutela pinturarekiko interesa nabaritzen dute Beart elkarteko kideek; erakusketa honetan ere askok ikusi dituzte margolanak gertutik.