Maialen Mazonen erailketa salatzeko kalera irten ziren atzo zenbait herritar, mugimendu feministak deituta. Bergarako Martxanterak taldeko Maite Aristegik azken kasu honen larritasun erantsian jarri zuen arreta, Mazon haurdun zegoelako eta hiru urteko umearen aurrean erail zuelako bikotekide ohiak.
Biktimaren babesgabetasun egoera eta Jaurlaritzaren erantzuna ere irmoki salatu zuten Martxanterek. Eusko Jaurlaritzako Segurtasun sailburu Josu Erkorekak adierazi zuen Ertzaintzak urtarriletik zekiela gizonak urruntze agindua urratzen zuela, eta gehitu zuen ez dela erraza bere burua arriskuan ikusten ez duen biktima bat babestea. Adierazpen horiek mugimendu feministaren haserrea piztu du.
Euskal Herrian aurten izandako bigarren hilketa matxista izan da Gasteizkoa, gizonezko batek Maria Lourdes del Hoyo hil zuen-eta maiatzaren 16an, Orion.
