Urtarrilaren 27ko jaialdian urteurrena bera aurkeztuko dute, Xaxauren sorrera gogora ekarriz, eta ondoren Danbaka musika lehiaketako publikoaren saria irabazi berri duen Aiert eta DJ Argi eta Txo izango dira gaua girotzeko. Sarrera hiru euro ordaindu beharko da.
Urteurrena aurkeztu ostean bilera ireki bat egingo dute otsailaren 4an Ehunduren bulegoan (11:00) 2023ko Pentekosteak antolatzen hasteko, Xaxauk jende eta ideia berriei ateak parez pare dituelako zabalik.
Aurten ere, txosnagunea Oxirondon seguruenik
Iaz Oxirondon jarri behar izan zuten txosnagunea Zubieta kaleko lanek eraginda eta aurten ere aurreikusten dute leku berean jarri beharko dutela Masterreka berritzeko obren ondorioz. Azokako aparkalekua leku egokia dela diote.
Gaur egungo xaxautarrek duela 15 urte konpartsa sortu zutenekin ere egon ziren 2022ko urrian, besteak beste, konpartsaren balioen transmisioa bermatzeko. Hain zuzen ere, Xaxauk etorkizuna bermatuta izan dezan konpartsak kide eta ideia berriak beharko dituztela nabarmendu dute.