Piezetako asko buztin zuriarekin eginda daude, eta beste batzuk, berriz, gorriarekin. Eskulturetarako, txamotadun buztina erabili dute eta aurten, material berri modura, lanpara moduko bi pieza jarri dituzte, portzelana eta egunkari paperez egindako nahasketa batez egindakoak. Era berean, Buztinzale elkarteko kide zen Maria Jesus Mancisidorren omenez, haren piezak ere jarri dituzte ikusgai.
Egubakoitzean ireki zuten eta, oraingoz, behintzat, harrera ona izaten ari da erakusketa, urtero moduan. "Egia esan, ez dugu kontrolatzen zenbat jende pasatzen den erakusketatik baina, oro har, oso komentario positiboak egiten dizkigute herritarrek kalean", azaldu du Nerea Olaskoagak, Buztinzale elkarteko kideak.
Jende gaztea elkartean
Buztinzale elkartea osasuntsu dagoela onartu du Olaskoagak. "Azken urteetan, jende gazte asko sartzen ari da. Badirudi, sare sozialen bitartez-eta, modan dagoela zeramika mundua eta gazteei ere asko gustatzen zaiela". Hori albiste ona dela gaineratu du, elkarteak martxan jarraitu dezan.
Felipe Zelaietaren bertsoak
Buztinzale elkarteko Belen Urutxurturen senarra da Felipe Zelaieta bertsolari mallabiarra, eta erakusketa ikustera etorri zela baliatuta, bi bertso eder bota zituen GOIENAko kameren aurrean, bertaratu zirenen txalo zaparradak jasoz.
