Hondakin ez-arriskutsuen tratamendurako jarduketa-sorta bat aurkeztu du gaur Arantxa Tapia Eusko Jaurlaritzako Ekonomiaren Garapen, Iraunkortasun eta Ingurumeneko sailburuak, eta jakinarazi du Epeleko zabortegiak (Angiozar) jasoko dituela Araban, Bizkaian eta Gipuzkoan sortuko diren era horretako hondakinak, lurralde horietako beste zazpi zabortegirekin batera.
Hain justu, Eusko Jaurlaritzak eta Debagoieneko Mankomunitateak zabortegia berriro irekitzeko akordioa lortu zuten martxoan, besteak beste, industria arloko beharrek eraginda. Dena den, hasiera batean, Mankomunitateak salatu zuen "aldebakarrez" hartutako erabakia izan zela.
Erabakiak, plan batean
Emandako informazioaren arabera, 2030erako Euskadiko Hondakinak Prebenitzeko eta Kudeatzeko Planean finkatu dituzte erabakiok. 2021aren amaieran onartu zuten, eta bi dira helburuak. "Batetik, hondakin horien isurketa-bolumen nabarmena murriztea, 2030 urtean sortutako hondakin guztien %15 izan arte", azaldu du Tapiak, eta bestetik, 2024tik aurrera baimendutako instalazioek, tartean Epelekoak, hiru lurralde horietan sortutako isurketa guztia jasotzeko "gaitasun nahikoa" izango dutela bermatzea, "instalazioen autosufizientzia" erdiesteko.
