Pello Garitano herrigintzaren ikurra hil da

Gaur hil da Pello Garitano Mendibil 82 urte zituela. Aski ezaguna eta maitatua zen Bergaran, herrigintzan egindako lanarengatik. Sarritan omendu dute; adibidez, 2009an, Pelloren Eguna antolatu zuten herriko eragileek eta 2020an, 40 urtetan egindako antolaketa lanagatik, haurren danborradak omenaldia ere egin zion. Alai taldeko kide ere bazen, eta elikagai bankuarekin ere elkarlanean jardun zuen, besteak beste Pello Garitanok.

Garitanoren aldeko hileta elizkizuna, astelehenean, hilak 20, egingo da Santa Marina Parrokian, 19:00. Familiak Oroilore tanatorioan hartuko ditu lagunak eta gertukoak, bihar 11:00etatik 13:30era eta astelehenean 11:00etatik 13:30era eta 15:30etik 18:00etara.

Erreakzio ugari

Herritarrek asko maite zuten Garitano eta berehala erreakzionatu dute.

Ion Unamuno Lokatzako kideak ere berba onak besterik ez ditu esan Garitanoren gainean. Elkarteari "oso lotuta" egon den pertsona izan dela azpimarratu du; are, Lokatzak urte batzuetan berari esker biziraun zuela ere gehitu du. "Lokatzari asko eman dio, baina baita herriko beste hainbat eragile eta proiekturi ere –danborrada, elikagaien bankua...– Hutsune handia utzi digu, ez baitago bera bezalakorik. Egundoko pertsona zen, paregabea", azaldu du Unamunok.

Ondoezik, Pentekoste jaietan

Osasunez gaizki egon da Garitano eta jaietan Bergarako gazteek zapia bidali zioten ospitalera. "Bergarako gazteon partez. Aurten Pentekoste jaietan faltan botako zaitugu. Animo Pello. Besarkada haundi bat!” zioen mezuak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.