Bergara 2030 egin herrixa plana onartu zuen udalbatzak atzoko bilkuran. Agenda 2030ek ezarritako helburuak hartu ditu Udal Gobernuak oinarri moduan plan estrategikorako, garapen jasangarrirako helburuak, hain zuzen ere. Helburu horien artean daude, besteak beste, pobrezia, klima larrialdia, genero berdintasuna, hizkuntza eta kultura aniztasuna, eta industriaren garapena. EH Bilduren aldeko botoekin, EAJren kontrakoekin eta alderdi sozialistaren abstentzioarekin onartu zen.
Agorrosin berrirako tramitea, aho batez
Bestalde, Agorrosingo futbol zelaiko lanak egin ahal izateko BKEren maileguaren eta bi finken dohaintza arautzen dituen hitzarmena aho batez onartu zuen udalbatzak, eta belar naturala kendu eta artifiziala jartzeko lehen faseko lanak udan zehar gauzatzea dago aurreikusita.
Digitala ez den arreta pertsonalizatuari begira lanean
Atzoko bilkuran aho batez onartu ziren, era berean, Saharako Errepublika Arabiar Demokratikoaren 46. urteurrenaren testuinguruan haren aldeko adierazpen instituzionala, Martxoaren 8a dela-eta udal taldeek aurkeztutako EUDELen adierazpen instituzionala, eta kontsumitzaile zaurgarriei arreta pertsonalizatua ematearen inguruan hiru taldeek aurkeztutako mozioa. Azken hori alderdi sozialistaren ekimenez landu dute.
Ukrainako gerraren presentzia, galdera eta eskaeretan
Azkenik, galdera eta eskaeretan Alonsok berak mahaigaineratuta, Ukrainak bizi duen egoera ere izan zuten hizpide. Hurrengo batzordean gaia landuko dutela adostuta, hiru taldeek salatu zuten Ukrainako gerra.
