"Gustura" gelditu dira Labegaraietako rokodromo berriak duen itxurarekin, bai Udal ordezkariak eta baita Pol-Pol Mendi Taldekoak ere. Eurek inauguratu dute goizean eta dagoeneko hainbat kirolari izan dira txoko berria estreinatzen.
Batez ere estalpe egoki bat eskatzen zuten Pol-Pol taldekoek, neguan ere, baldintza egokiekin, bertan ibili ahal izateko. Eta azkenean, hamar urte baino gehiago eskaerak egiten ibili ostean, “kostata”, baina eurek nahi zutena iritsi dela azaldu du Pol-Pol Mendi Taldeko eskalatzailea den Mikel Uribesalgok.
Gaineratu du, hemendik aurrera batzuk egongo direla boulderrera ia egunero joango direnak, eta beste batzuk aldiz, euria egiten duenetan aprobetxatuko dutenak txoko hori.
Rokodromoa, eskalatzaileen arteko harremana mantentzeko eta jende berria ezagutzeko lekua ere badela adierazi du Uribesalgok eta eskalatzaileendako topagune moduko bat ere badela, eskalatzeko dauden tokien inguruko informazioa trukatzeko.
Udaletik, bestetik, interesa dutenei bertaratzeko animatu diete.
Guztira, 50.000 euro inguruko aurrekontua bideratu dute Udaletik rokodromora.
