Gaur, urriak 20, elkartu dira Bergarako Seminarixoan finantza erakundeetako ordezkariak eta alkateak eta Gorka Artola alkateak egin die harrera erakutsitako konpromisoa eskertuz. UEMAko lehendakari eta Elgetako alkate Iraitz Lazkanok ere hartu du hitza ekitaldian eta, besteak beste, Laboral Kutxaren, Kutxabanken eta Bankoaren euskararekiko jarrera txalotu du.
Ondoren, hiru finantza erakundeetako ordezkariek egin dute berba. Laboral Kutxak atzera begiratua egiteaz gain, etorkizunari anbizio handiarekin heltzen diola esan eta gazteengan jarri du interes fokuetako bat. Kutxabankek, berriz, egoera zehatz batzuen adibideak jarri ditu ahalik eta euskara gehien bermatzeko. Eta Laboral Kutxarekin eta Kutxabankekin 2016an sinatutako hitzarmena eguneratzeaz gain, UEMAk hirugarren finantza erakunde bat ere erakarri du hitzarmen berrira, Bankoa.
Ekitaldiaren amaieran 44 udal ordezkariak hitzarmena sinatzeko igo dira Seminarixoko agertokira. Debagoienari dagokionez, ekitaldian egon dira Bergarako alkate Gorka Artola, Oñatiko Izaro Elortza, Antzuolako Beñardo Kortabarria, Elgetako Iraitz Lazkano eta Aramaioko Lierni Altuna.
