Modu horretan egiteak ekitaldia bera desitxuratuko zuela iritzita hartu zuten erabakia atzo udaletxean egindako bileran. Bestalde, jairik egongo ez dela behin eta berriz nabarmendu ostean, kultura eskaintza bereziki indartzeko apustua egingo dutela aurreratu zion GOIENAri kultura zinegotzi Kristina Markinak. "Danborrada bigarren urtez ez egitea pena bat da... Bestalde, egitarauari dagokionez oraingoz ezin dugu apenas ezer aurreratu. Kultura eskaintza bereziki indartuko dugu, hori bai esan dezakegula".
Dantza solte txapelketa, Seminarixoan
Jairik ez, beraz, baina pandemia aurretik klasiko ziren ekitaldietako batzuk egingo dira. Irailaren 10ean, esaterako, Moises Azpiazuren omenezko dantza solte txapelketaren 36. edizioa jokatuko da Seminarixoan (19:30). Bergarako Musika eta Dantza Eskolako idazkari Nekane Gabilondok adierazi duenez, argi geratu zen iaz Seminarixoa leku egokia dela: "Pandemian gauden bitartean neurri guztiak bermatu ditzakegu eta dantzariendako eurendako ere lekuko oso aproposa da. Izen-ematea egubakoitzean itxiko da eta, beraz, ezin dezakegu esan oraindik zenbat bikotek hartuko duten parte. Hala ere, ohiko kopuruetan ibiltzea espero dugu, hamabi edo hamahiru bikote". Izena eman dutenen aurten daude iazko irabazleak: Bergarako Saioa Galarraga eta Julen Murgiondo.