Askotariko ekintzez gozatzeko aukera izango dute aurtengo udan Bergarako haur eta gaztetxoek. Izan ere, aisialdi eskaintza “zabala” aurkeztu du Udalak, ikastetxeetako ordezkariekin, gaztelekukoekin eta Jardunekoekin batera.
Udaleku irekiak
Astelehenean hasi zituzten udaleku irekiak, esaterako. Aurten lau urteko umeetatik hasi eta 12 urtera bitarteko 373 haur eta gaztetxo ari dira parte hartzen eta 50 hezitzaile dituzte alboan. Osintxun eta Angiozarren ere antolatu dituzte.
Bergarako hiru ikastetxeek instalazioak utzi dituzte gainera udalekuak aurrera eramateko eta haur ugari batu dituen euskarazko aisialdi hezitzailea eskainiko dute beste urte batez.
95.000 eurotako aurrekontua bideratu du Udalak udaleku irekietara.
Gaztelekuko udako jarduerak
Gaztelekuko udako jarduerei dagokienez, azpimarratu behar da urte guztian zehar eskaintzen dituzten askotariko eskaintza zabaldu egiten dutela nerabeen opor garaian. Aurten gainera, berrikuntza moduan, aniztasun funtzionala daukaten gaztetxoendako ere eskaintza espezifikoa sortu du Udalak eta gainontzean ere, askotariko jardueren eskaintza izango dute. Ekainaren 18an hasi ziren ekintza berezi horiekin eta uztailaren 30era arte izango dituzte halakoak nerabeek.
Urte guztian zehar Udalak bertara bideratzen duen aurrekontua 120.000 euro ingurukoa da.
Kirol kanpusa
Kirol kanpusa, berriz, 249 haurrekin hasi dute eta aurreikuspen guztiak gainditu ditu izen-emateak, 100 haur inguru espero baitzituzten. Parte-hartzaileak hainbat joko eta kirol praktikatzen ari dira eta horretan jardungo dute uztailaren 16ra bitartean.
Kirol kanpusaz gain, igeriketa ikastaroak ere jarri dituzte martxan.
Laboratorium museoko eskaintza
Laboratorium museoan eskainiko dituzten jarduerak uztaileko lehen hamabostaldian egingo dituzte eta berrikuntzekin datoz. Izan ere, saguzarrak hobeto ezagutzeko jarduera berezi bat eskainiko dute eta astronauta baten moduan entrenatzeko saioak ere eskainiko dituzte.
Jarduera horietarako 5.000 euro inguru bideratu ditu Udalak.
Liburutegia, Usondon
Gaineratu dute, aurreko urteetan Agorrosinen jarritako liburutegia, aurten Usondo parkean egongo dela, pertsona gehiagorengana iristeko helburuz.
