Aspaldiko partez Ipintza futbol zelaira gerturatzerik izan ez dutenek sorpresa polita hartuko dute hurrengo bertaratzen direnean; izan ere, askotariko mezuz, margolanez eta kolore biziz apainduta aurkituko dituzte bertako hormak eta txokoak.
Futbolean egitera edo futbola ikustera gerturatu ohi dira elkarteko kideak instalazioetara, baina atzo eta gaur bestelako zereginetan ibili dira buru belarri.
Gozatuz jokatu izeneko proiektua dago honen guztiaren atzean, eta adin guztietako kideak elkartu ditu dinamikak. Futbol eskolako kideetatik hasi eta lehenengo talderainoko jokalariak, hain zuzen ere. "Denei luzatu diegu gonbidapena eta erantzun oso ona jaso dugu. Talde guztietatik etorri da jende. Ehun lagun pasa, tartean gurasoak ere bai", esan du BKE-ko kide eta Gozatuz jokatu ekimeneko koordinatzaile Mikel Larrañaga Burgañak.
Oinarrizko lau balore horma irudietan
Bizikidetza, kiroltasuna, euskara eta emozioen kudeaketa dira Bergara Kirol Elkartean oinarrizkotzat jotzen dituzten lau baloreak. Horiek landu eta sustatu nahi dituzte futbolaren bitartez, eta horien inguruko gogoeta izan da egunotako dinamikaren oinarrian. "Gozatuz jokatu baloreen proiektua da, eta horien inguruko lanketan ari gara. Urteak aurrera badoaz ere ez dugu ahaztu behar nondik gatozen eta nora goazen, eta bada hausnarketarako gaia. Azken finean, kirol elkartearen nortasuna eraikitzeko markoaren barruan sartu behar da ekimena", azaldu du Larrañagak.
Bai atzo bai gaur taldetan antolatuta ekin diote dinamikari BKE-koek. Lau baloreen inguruan gogoeta txiki bat egin eta emaitza hormetan margotzea izan da ekintzaren xedea. "Horma da gure jokalariek eta entrenatzaileek landutakoaren isla. Landutako hori presente edukitzeko eta lantzen jarraitzeko bidea ere bada", zehaztu du Larrañagak.
Auzolanean
Kluba osatzen duten partaide guztien arteko auzolana izan da ekimena. Hainbat txokotan banatu dute bi futbol zelaien eremua eta txandaka txoko guztietatik igaro dira parte-hartzaileak. Askotariko mezuak gelditu dira jasota, hala nola Ongi etorri Ipintzara, Batera indartsuauak ga!, Danak ez dau balio irabazteko, Euskaraz bizi nahi dugu, Errespetua, Berdintasuna, Enpatia, Bakarrik jun ezkero azkarrau ailegauko za, danok batera urrinago helduko ga!...
Esku askok hartu dute parte ekimenean, eta hori zen xedea, baina horma irudiak egiten arituagoak direnen laguntza ere izan dute BKE-koek Txokoetako batean aritu dira, esaterako, Jon Leibar eta Iñaki Aldazabal. Maddi Larrañagaren, June Odriozolaren eta Lexeia Rocherren esku-hartzea ere garrantzitsua izan da. Hainbat horma-irudiri forma emateko ezinbestekoak izan dira. "Bergararrak dira eta gertukoak. Beraiek ere honen parte izatea nahi genuen", azaldu du Larrañagak.