Euskaltel-Euskadik atzo, martitzena, aurkeztu zuen Itzulirako taldea eta Mikel Aristi bergararra hautatuen artean dago. Dena den, min hartuta dago, duela astebete eroriko bat izan baitzuen Italiako Coppi e Bartali probako lehen etapan eta orkatilan bihurritu bat du. Modu horretan, dituen aukera guztiak baliatzen ari da orkatila ondo sendatu eta Itzulia lehiatu ahal izateko. Aurrez, zapatuan, Miguel Indurain saria izango du azterketa gisa.
Bestalde, Euskadi Fundazioko emakumezkoen Laboral Kutxa taldeak 2021eko denboraldia prestatzen jarraitzen du eta taldea osatzen duten hamahiru txirrindulariek kontzentrazioa egingo dute asteburuan Itziarren (Gipuzkoa), Ion Lazkano talde zuzendari berriaren agindupean. Talde horretan daude Ainhize Barrainkua, Xubane Garai eta Garazi Estebez aretxabaletarrak.
Zapatuan, gainera, Uxue Otxoa txirrindularitzan espezializatutako kirol psikologo arrasatearraren bisita jasoko du taldeak. "Alderdi psikologikoek kirol mailan, bereziki txirrindularitzan, eta maila pertsonalean duten eraginaren inguruan arituko dira".
