Bederatzi postu izan ditu, aurten, Bergarako Erramu Zapatuko azokak. Pandemia egoerak baldintzatutako azoka izan da, zalantzarik gabe. Ekoizle kopurua oso txikia izan da eta azoka eremua seinaleztatua eta mugatua izan da. Esaterako, azokara nondik sartu eta nondik irten finkatuta zegoen, sarrera eskuetan gela emateko banatzailea zegoen eta erosleek seinaleztatutako norabidea jarraitu behar zuten postuak ikusteko eta kontrako norabidean inor ez gurutzatzeko.
Salmenten inguruan galdetuta pozik agertu dira ekoizleak. Bergarako bi postu izan dira: Josean Azkarate eztiarekin eta erlezaintzarekin lotutako produktuekin eta Etxague baserriko Mari Carmen Etxeberria barazkiekin, ogiarekin eta bestelako produktu askorekin.
Ia guztia saldu dutela adierazi dute, eta jendea aurten goiz ibili dela azokan.
Bestelako ekoizleak
Inguruko herrietatik etorritakoak izan dira gainerako ekoizleak. Esaterako, Elgetatik Baobeer garagardoak, Antzuolatik Amatxo gaztandegia, Soraluzetik Egotza etxeko ahuntz gazta kremak edota Arizaga baserriko produktuak... Kilometro gehien egin dituztenen artean Amurrioko gozoak, Ekotaloren produktuak edota Donibane Garazi eta Baigorri artean dagoen Lasako Ximun Iribarneren ahatekiak nabarmendu dira. Iribarne ezaguna da Bergaran; izan ere badira hamabost bat urte ez duela hutsik egiten ez Erramu Zapatuko ferian ez San Martingo azokan.
Azoka antolatzeko ahalegina eskertu dute ekoizleek, eta baita ere herritarren erantzuna. Pandemia gainditu eta betiko martxara itzultzeko gogoz daude lehen sektoreko ekoizleak ere.