Wolfratex enpresaren inguruan honako hau dio Udal Gobernuak: "Wolfratex enpresaren kasuari dagokionez, osasun pandemiaren hasierako hilabeteetan, babeserako maskaren produkzioa martxan jartzeko aukera izan zuen, behar handiena geneukan momentuan eta apustu ausarta egin zuen. Enpresa martxan jarri eta egokitzeko egin behar zituen moldaketak egiteko, Udalak, berari zegozkion lanak bideratu zituen, ulertzen dugulako hala dagokiola. Bergaran dauden enpresek lanpostuak sor ditzaten eta hauek manten daitezen laguntzea dagokio Udalari, zer esanik ez momentu berezi hartan".
Horrekin batera, diote Udal Gobernutik, bertako enpresetan kontsumitzea da lehentasuna: "Adibidez, udal langileek erabil ditzaten, Wolfratex-en ekoizten diren maskarak erosten ditu".
"Erantzukizunez" jokatzeko eskaera norbanako eta eragileei
Udal Gobernuak aditzera ematen duenez, azken asteetan izandako kaleratzeen aurrean hainbat eragile politikok eta enpresak berak egindako adierazpenek hautsak harrotu dituzte: "Egoera horren aurrean dei egiten diegu eragile eta norbanakoei erantzukizunez jokatu eta zurrumurruak ez zabaltzeko. Harreman jarraitua du Gobernuak Bergarako enpresekin, are gehiago COVID-19ak eragindako egoera zail honetan. Izan ere, osasun ona duen ehun enpresariala izatea beharrezkoa da herria bizirik egon dadin eta bergararren bizi baldintzak duinak izan daitezen. Herrian dauden lanpostuei eustea eta berriak sortzea behar beharrezkoa da-eta".
Amaitzeko, adierazi dute Bergarako enpresa eta langileekiko konpromisoa berresten dutela eta ildo horretan lanean jarraituko dutela: "Enpresare eta FEX bezalako foroetan parte hartzen jarraituko dugu, udal jarduna eta baliabideak herriko sustapen ekonomikoa indartzera bideratuz".
