Honako lan hauetan dihardute Amillagan, besteak beste: espaloiak zabaldu eta horien zorua berritu; burdinazko ur hornidura berria ezarri; euri urak jasotzeko azpiegitura berritu; LED farola berriak jarri; Laino skatepark pareko espaloia oztopatzen duen kutxeta handiaren tapa kendu eta espaloiaren kota berean utzi; eta autobus geltokia lekuz aldatu.
Oinezkoen zirkulazioa eta autobus zerbitzua uneoro bermatu badira ere, obrek eragin zuzena ari dira izaten ibilgailuen zirkulazioan. Gaur gaurkoz ia Amillaga osoan bi norabidetan mugitu daitezke ibilgailuak baina herritik irteteko, norabide guztietan, Ernai kalea baliatzen ari dira.
Sasoi Eraikuntzak enpresa ari da lanok gauzatzen, 376.735 euroko aurrekontuarekin, BEZ barne. Hala ere, Eusko Jaurlaritzaren Industrialdeetako Renove Planari esker 150.000 euroko dirulaguntza jaso zuen Udalak eta hain justu horregatik erabaki zuten proiektuarekin aurrera egitea.
Ibargaraiko lanak, aurreikusi baino lehenago
Martxan dagoen beste obra esanguratsu bat da Ibargarai kaleko 4 eta 14 atarien arteko zatia berriro urbanizatzearena; 2019ko abuztuan ur horniduran izandako matxura bati behin betiko konponbidea emateko eta kale zati hori berriro urbanizatzeko abiatu zuten obra. Udaletik adierazi dute lanak seguruenik aurreikusi baino lehenago bukatuko dituztela; hau da, irail bukaerarako amaitzea espero dute.