Fernando Legaz zuzendariaren arabera, eskaera guztiei zerbitzua eskaintzen ari dira, "kontuan hartu gabe bi hilabete hauetan pasatzekoak ziren autoak edota orain pasatu behar dutenak diren". Fernando Legaz zuzendariaren arabera. "Hasiera batean, azterketaren balioa bi hilabete hauetan iraungi zaien ibilgailuek, alarma egoera bukatzen denetik hilabete bateko epea izango dute berriro azterketa egiteko".
Bestalde, konfinamendua hasi aurretik azterketa pasatu ez zuten eta bigarren azterketa pasatzeko beharra zeukaten ibilgailuak ere pilatzen ari dira orain, eta horrek guztiak eragiten ditu egunotako ilara luzeak.
Segurtasun neurriei dagokienez, sartzen diren pertsona guztiei tenperatura neurtzeko kamera bat jarri dute, eta manparak ere jarri dituzte harreran. Bestalde, langile guztiek dituzte eskularruak, maskarak eta gelak.
Azterketa egiteko prozedura ere aldatu egin da. "Aldaketa esanguratsuena da, bezeroen eta inspektoreen segurtasuna bermatzeko, bezeroa ez dela ibilgailutik irteten azterketak irauten duen bitartean. Lehen inspektoreek egiten zituzten hainbat proba, orain bezeroak egiten ditu, inspektorea ez dadin autoan sartu".
Halere, zuzendariak adierazi duenez, azterketak berak ez die zailtasun handirik eragin, eta zailena bezeroak ordenatzea eta bulegoan arreta eskaintzea dela dio, jende pilaketak ekiditeko. Izan ere, segurtasun distantziak mantendu behar izaten dituzte txanda eskatzera doazenean edota bukaerako txostena jasotzerakoan.
