Lanon helburua da eremu horretan ur, euri-ur eta argiteriako azpiegiturak berritzea, eta errepide zatia eta espaloia berriro urbanizatzea. Erabakia hartu aurretik inguruko merkatariekin, Aranzadi Ikastolako ordezkariekin eta bizilagunekin elkartu dira eta, diotenez, begi onez ikusi dute orokorrean. Obra aurreratzeko erabakiari dagokionez, bizilagunak dira gobernuaren kezka nagusia.
Kaleko zati horretako aparkalekuak hustu egin dituzte eta asmoa da seminarioko patioko zati bat aparkaleku moduan erabiltzea, betiere alarma egoerak irauten duen bitartean.
Alarma egoera lanak lehenago bukatzeko lagungarri izatea espero dute
Obrak adjudikatu zenean sei hilabeteko epea zehazten zen kontratuan baina Udalak espero du lanak lehenago bukatzea, mugimendurik ezean lanak garatzeko erraztasun gehiago izango duelako enpresa eraikitzaileak.
Hain zuzen ere, obra Construcciones Artzamendi enpresari adjudikatu zitzaion 308.849 eurotan, BEZ barne. Obraren zuzendaritza BEB Arkitektoak enpresaren ardura da eta lanen exekuzio materialaren zuzendaritza Iñaki Arregi Garitanok darama.