Ainhoa Lete Bergarako Ongizate saileko zinegotziak adierazi duenez, herritar sareak erantzun "oso ona" izan du: "Momentu honetan, 200 pertsonatik gora gara boluntario gisa ari garenak, eta beraz, erantzun oso ona izan dugu, eta erabiltzaileak, berriz, 14 ditugu identifikatuta. Hala, laguntza emateko, momentuz soberan gaude, baina, badugu kezka bat; egoera hau aurrera joan ahala, beharrak hazten joango dira, boluntarioak gaixotzen…, eta, beraz, sekula ez da nahikoa".
Zerbitzua, gaur gaurkoz, zenbait erosketa egiteko, eta hondakinak ateratzeko bada ere, beste zenbait behar sortuko direla ere adierazi du Letek: "Zaintza hor dago, eta Goienagusitik telefonoko konpainia egiten hasiko direla edo hasi dira…, eta horri erantzuteko ere prest egongo gara".
Boluntario izateko edo zerbitzua jasotzeko
Boluntario izateko 18 eta 60 urte arte bitartean izan behar dira, osasun arazorik ez da izan behar, eta ahal dela jende heldua eta gaixotasun kroniko bat inguruan ez izatea. Boluntario gisa aritu nahi duenak, bergarazaintzen@gmail.com helbidera idatzi beharko du.
Etxetik irten ezin denak eta zerbitzuaren beharra duenak, aldiz, 010 telefonora deitu beharko du, 08:00etatik 18:00etara bitartean.
Boluntario lana egitearen onura
Bergaran bizi den Ainhoa Martin Bergara zaintzen egitasmoan parte hartzen ari da boluntario gisa. Hala, oinarrizko beharrak dituen herritar nagusi bati laguntza eskaintzen ari da.
"Pasa den astean deitu zidaten adineko pertsona batek laguntza behar zuelako, eta berari laguntzen aritu naiz: erosketak egin… Hala, konfinamendu egoera honetan dagoen pertsona hau, ez dago osasunez gaizki, baina, kontagiatzeko arriskua du kalera irten ez gero. Nire kasuan, indibidualki zentratzen naiz pertsona bakarrean, nire kontaktua du berak, eta behar duenerako deitu egiten dit. Asko eskertu dit, bai momentuan eta, baita, ostean ere; deitu egin zidan eskerrak emateko, eta hori norberarentzat positiboa da… Duda barik jendeari egitasmora batzeko deia ere egingo nieke".
"Egoera honetan gehien pairatzen dutenak arrisku gehien duten gizarteko taldeak dira, eta zorionez bagaude pertsona batzuk gaitasun gehiago ditugunak egoera hauek normalitate gehiagorekin eramateko, ahal dugun neurrian. Denok egin dezakegu zerbait egoera honetan laguntza eskaintzeko, gutxi eginda, asko egin dezakegu, eta asko eskertzen da".
