Moises Eguren margolariaren erakusketa inauguratu dute

Maialen Santos 2019ko urr. 12a, 11:54

Atzo iluntzean egin zuten irekiera ekitaldia, eta erakusketan jarri dituzten margolanak aurkeztu zituzten. Margolariaren obrak urriaren 27ra arte egongo dira ikusgai, Bergarako Aroztegi aretoan.

43 obra daude ikusgai, guztira, artistaren omenez eginiko erakusketan. Margolanetako asko erretratuak dira, Moisesek berak gertuko jendeari eginikoak. Margolariaren anaia Joxe Mari Egurenek azaldu moduan, Moisesek pintura eskolak eman zituen gaztetan, eta beraz, ikasleek maisua "gogora ekarri" nahi izan dute erakusketa honen bitartez. Are, erakusten ez ezik, hil arte margotzen jardun zuela azaldu zuen; hain zuzen, amaren erretratu bat bukatu gabe utzi baitzuen. 

Lan sakona

Ia bi urteko lana egin dute BEARTeko kide diren Xabier Agirre, Antton Arrillaga eta Jose Luis Azkaratek, eta denbora horretan guztian margolariaren 94 pieza aurkitu eta katalogatu dituzte -neurriak eta ezaugarri teknikoak kontuan hartuta-. Horietako "esanguratsuenak" bildu dituztela Aroztegin azpimarratu nahi izan zuen Agirrek, eta eskertuta azaldu zen jasotako laguntzagatik: "herritarren eta komunikabideen laguntzarik gabe ez litzateke posible izango erakusketa hau egitea, beraiek izan baitira margolanak aurkitzen lagundu gaituztenak". Margolan gehienak familiaren gertukoen etxeetan aurkitu dituzte.

Horrez gain, margolariak obrei ateratako argazki batzuk medio, badakite beste hamasei bat koadro ere margotu zituela; ez dakite, ordea, non egon daitezkeen. Oraindik horiek aurkitzeko "itxaropentsu" azaldu zen Agirre. 

Familia, eskertuta

Joxe Mari Egurenek familiaren izenean eskerrak eman zizkien herritarrei, udalari eta BEARTeko kideei, anaia gogoan izateagatik. Bergarako alkate Gorka Artolak, bestalde, egindako lanagatik errekonozimendua eman zien obren identifikazio lanetan aritu direnei. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak