Euskadi Brass proiektua 2014ean sortu zen eta topaketa eta tailer ezberdinak diseinatu eta antolatzen ditu. Horietan, musika beste adierazpen artistiko askorekin fusionatzen da, hala nola antzerkia, arte plastikoak, literatura edota gastronomia. Alberto Urretxo taldeko zuzendari tronboi-joleak dio helburu nagusia ume eta gazteen heziketa musikal, artistiko eta kulturala osatzea dela.
Taldeko kideak sortzen diren proiektu ezberdinetarako entseguak egiteko elkartzen dira. Urretxok dio agenda kontuak direla eta zaila den arren, normalean ondo koordinatzen direla eta oso esperientzia aberasgarria eta produktiboa izaten dela guztientzat.
Taldeko beste debagoiendarra Andoni Moñux da, bergararra da bera eta Amsterdameko kontserbatorioan tubako ikasketak amaitu berri ditu. Moñuxen esanetan, Euskadi Brass taldean musika maila altua izateaz gain laguntasuna ere handia da.