Bi aldaketa nagusi daude batzordeen antolaketan, aurreko agintaldiarekin alderatuta: ingurumenak eta berdintasunak batzorde propioa izango dute. Hori bai, Artolak argi utzi zuen funtzionamendua ikusi ahala aldaketetara zabalik daudela. Hain zuzen, oposizioko talde nagusiak, EAJk, batzordeak eratzeko orduan eurekin kontatu ez dutela gogoratu zuen; horren aurrean, Artolak batzordeetan aldaketarik apenas egon ez dela esan zuen eta horregatik ez dutela oposizioarengana jo.
Udal Gobernuan, bost liberatu
Zinegotzien dedikazioari dagokionez, Udal Gobernuko bost kidek jasoko dute liberazioa. Bi kide %100eko dedikazioarekin eta hiru heren banako dedikazioarekin. Gorka Artola alkateak 51.000 euroko soldata gordina izango du urtean, 14 pagatan banatuta. Ainhoa Lete alkateordeak 41.000 euroko soldata gordina izango du; Aitor Arantzabalek eta Kristina Markinak 13.000 eurokoa, eta Ekaitz Aranberrik 13.650 eurokoa.
EAJko Maite Agirreren liberazioa
Era berean, 2016ko Udal Legea oinarri hartuta, EAJko Maite Agirre %100ean liberatuko dute eta haren soldata gordina izango da 35.454 eurokoa urtean. EAJ eta alderdi sozialista abstenitu egin ziren gobernuaren proposamenaren aurrean, eta ondoren EAJk salatu zuen Agirreren liberazioaren aurrean EH Bildu abstenitu egin zela, eurak gobernuan zeudenean, 2017an, Artolaren liberazioaren alde bozkatu zutenean.
Ortiz de Zarateren kargu-hartzea
Bestalde, ekainaren 15ean egoterik izan ez zuenez, EAJko Esther Ortiz de Zaratek zinegotzi kargua hartu zuen atzo, ‘legeak hala behartuta’ formula erabilita.
