Portal Factory da lantegiaren izena, eta 4.900 metro karratuko azalera erabilgarria dauka, 17 metroko altuera eta 80 tonara arteko garabi ahalmena. Neurri horiekin, Bergarako kooperatibak, makina handiak fabrikatu ahal izango ditu portiko erako arkitekturarekin. Modu horretan, gero eta handiagoa den eskaerari puntako teknologiarekin erantzuteko ahalmena izango du Soralucek.
Instalazioa ezagutzeko aukera
Egunotan, Soraluce Summit 2019 ekitaldia egiten dabiltza, instalazio berria eta Soralucek duen dimentsio teknologikoa ezagutzeko aukera emanez; eta, zapatuan familien eguna izango da: "Langile ohiak, erretiratuak, gaur egungo langileak... etorriko dira. Dibertitzeko unea izango da", azaldu du komunikazio arduradun Maite Riañok.
DannobatGroup-eko kide
Eguneko, 250 bat bezero pasa dira Soralucetik; eta, zapatuan, 500 lagun elkartzea espero dute. Soralucek bost ekoizpen planta dauzka Euskal Herrian; eta, horrez gain, Bikaintasun Zentro bat ere badu Alemanian. Nabarmendu behar da Soraluce DannobatGroup-eko kide dela.