Militarrak chavismoarekin daudela nabarmendu dute Willy Toledok eta Agustin Otxotorenak

Arantzazu Ezkibel 2019ko ots. 23a, 12:48

Willy Toledo aktore ezagunak eta Agustin Otxotorenak bete egin zuten atzo Bergarako kartzela zaharra. Venezuelak bizi duen egoeraz berba egin zuten. Toledok azaldu zuen 2003ko egoera berean gaudela; orduan Irak hartu zutela indarrez, eta oraingoan, ezer egiten ez bada behintzat, Venezuela hartuko dutela indarrez.

Kartzela zaharreko aretoa lepo bete zen atzo iluntzean Toledoren eta Otxotorenaren arteko hitzaldia entzuteko. Venezuela ondo ezagutzen dute biek eta han gertatzen denaz eta hango testuinguruaz berba egin zuten atzokoan.

"Ez da Irak izango, Vietnam izango da"

Toledok azaldu zuen 2003ko egoera berean gaudela, "Irak inbaditu zuten garaian moduan". "AEBetako Gobernu ez ipurgarbitzailea gutxienetakoa da Venezuela; eta, horrez gain, baliabide natural ugari ditu: petrolioa, diamanteak, urrea, zilarra... gainera, AEBetatik bi mila kilometrora besterik ez dago", azaldu zuen. Toledoren ustez, egoera hau geldi dezaketen bakarrak Txina eta Errusia dira –militarki aurre egiteko gauza diren bakarrak–. "Ez badute hau geratzen Irak bat ez, Vietnam bat izango da hura", gaineratu zuen.

Espainiako Gobernuak eta Europar Batasunak izan duten jarreraren aurrean, Toledok esan zuen Espainiako Gobernua betidanik izan dela AEBen zuritzailea: "Aznarrek egin zuen berdina egingo du Sanchezek ere. Gainera, nazkagarria iruditzen zait Sanchezek ultimatuma ematea Madurori: legezko presidentea da Maduro, sei milioi boto izan zituen", esan zuen.

"Militarrak chavismoarekin daude"

Venezuelan bizi den euskalduna eta chavista da Otxotorena. "Hemengo berrietan Venezuela Afrikako herrialde baten moduan irudikatzen dute, eta hori ez da horrela. Han jendea pozik bizi da", azaldu zuen oreretarrak.

Egun hauetako berria da Kolonbiarekin muga egiten duen Tienditas zubiaren inguruan gertatzen ari dena. Giza laguntza bidali nahi du Guaidok Venezuelara, baina Venezuelako gobernuak ez die mugatik pasatzen utzi nahi: "Ez dago horrelako zerbait egiteko eskubiderik. Zer gertatuko den ez dakit, baina herriaren kontra egingo dute. Badakite Venezuelan ez dela golpe bat gertatuko, militarrak chavismoarekin daudelako, horregatik kanpotik sartu nahi dute presioa", azaldu du Otxotorenak.

Hitzaldia entzutera joandakoek galderak egiteko aukera izan zuten amaieran, eta solasaldia sortu zuten. Amaieran, familia argazkia egin zuten hizlariek eta entzuleek.

Willy Toledo eta Agustin Otxotorena, hitzaldira joan ziren herritarrekin. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak