Bergara hobetzeko ideiak 2019 izena jarri diote ekimenari, eta horren helburua da herritarrek Bergaran gauzatu nahi dituzten ideiak jasotzea, ez hainbeste profesionalen proiektuak. Eta proposamen horiek edozein eratakoak izan daitezkeela argitu dute: kultura, gizartea, hirigintza…
Udalak onartu du 260.000 euroko partida horretarako, eta gutxienez bi proiektu egin ahal izateko bakoitzak 130.000 euroko kostua izango du gehienez. Eta bete beharreko baldintzak honako hauek dira:
- Interes orokorrekoa izatea.
- Urtebetean egin ahal izatea.
- Udalaren eskumena izatea.
- Teknikoki bideragarria izatea.
Udalaren webgunera bideratu beharko dituzte ideiak herritarrek otsailaren 25etik martxoaren 17ra bitartean; BAZen eta Agorrosinen jarriko dituzten kutxatan ere sartu ahal izango dira. Balorazio juridiko, tekniko eta ekonomikoa egin ondoren ideiak jendaurrean jarriko dituzte herritarrek bozkatzeko.
Sariak jasotzeko aukera
Lau baldintza horiek betetzen dituzten proposamen onenak saritu egingo dituzte. Helduen proposamen onena 1.000 eurorekin sarituko da, eta bigarrena 500 eurorekin. Gaztetxoen kasuan, 150 euro jasoko ditu onenak liburu eta disko dendatan gastatzeko. Gainera, botoa ematen duten herritarren artean zortzi sari zozketatuko dira: helduen artean, 150 euroko lau bonu; eta gaztetxoen artean, 2019ko Seminarixoko umeen ekintza guztietarako lau bonu.