Soraluce enpresak Osintxuko eta Mekolaldeko ardatza egonkortu gura duela-eta Amillagako eraikina eta lursaila salduko ditu eta bertan Lidl supermerkatu bat irekitzea dago aurreikusita. "Aktibitate honek ez die herriko komertzio txikiei eragingo; bertan dauden supermerkatu handiei bai, baina haien arteko lehia izango da. Hain zuzen, baldintzak jarri ditugu herriko komertzio txikiei ez diezaien eragin: aktibitate bakarra eta elikaduraren bueltakoa eta denda txikirik ez egotea inguruan, besteak beste", uste du Elena Lete alkateak.
EH Bilduk "errespetu falta" moduan definitu zuen gobernuak lehenago informatu ez izana: "Prozedura ez zaigu zilegi iruditzen. Halako hitzarmen bat garatzeak lanketa sakon bat behar du eta ez da zentzuzkoa oposizioari bost egun aurretik aurkeztea dokumentazio osoa eta ezohiko bilkura batera deitzea; guk dakigula, ez da lanketarik eman hirigintza eta garapen ekonomikorako batzordeetan", dio Gorka Artolak.
Irabazik uste du hitzarmena "oso negatiboa" dela: "Eroski, Super Amara, Dia eta orain Lidl... Uste dugu dagoeneko nahikoa dugula; honek ekarriko duena konpetentzia areagotzea eta sektore horretarako prekarietatearen areagotzea. Hitzarmen honek erakusten du gobernu honek komertzio handiaren aldeko apustua egiten duela komertzio txikiaren gainetik".
