%5,2ko igoera udal aurrekontuan, eta desadostasuna herriko beharren gaineko irakurketan

24 milioi euro pasatxoko (24.009.000) aurrekontua onartu du Bergarako Udalak 2019rako, iazkoa baino %5,2 handiagoa. Gobernuak nabarmendu zuen Bergaran lehen aldiz onartu direla aurrekontuak urtea bukatu aurretik; EH Bilduk eta Irabazik kontra bozkatu zuten, Bergararako behar nagusien gainean desadostasuna dagoela agerian utzita. Bestalde, Zubietako bizilagunen haserrea protagonista izan zen, beste behin, osoko bilkura baten.

Gobernuaren proiektuen artean, seminarioan lur azpiko aparkalekua egitea eta Labegaraietako kiroldegia berritzea dira lehentasun nagusiak. Aparkalekurako, iaz eskatutako milioi bat euro pasako maileguaz gain 80.000 euroko partida bideratu dute eta bertako ingurua berriro urbanizatzeko ere ia 400.000 euro gorde dituzte, zuloa egin ostean ingurunea txukuntzea badelako hurrengo urterako asmoetako bat.
 
Labegaraietarako, berriz, ia milioi bat euro bideratzen dira aurrekontuetan, eta horietatik zati garrantzitsu bat Diputazioaren diru-laguntzetatik dator. Horrez gain, etxez etxeko zerbitzua udalekotzeak, besteak beste, ongizate zerbitzurako partida nabarmen handitzea ekarriko du.

Oposizioarekin negoziazioa azken unera arte mantendu dutela dio alkateak eta nabarmendu du bereziki EH Bilduk ez duela euren proiektuen aurka egin.

EH Bildu, etorkizuneko Bergara definitu guran

EH Bilduk ez du begi onez ikusi gobernuaren aurrekontu proposamena eta osotasunera emendakina eta bost emendakin partzial aurkeztu zituen. Oposizioko talde nagusiak etorkizunean nolako Bergara gura den denon artean zehaztea ezinbestekoa dela deritzo, eta diote gobernuari erraztasun handiak jarri dizkiotela, emendakin partzialen bidez, euren ekarpenak ere jasota geratzeko.

Irabazi: "Aurrekontu elektoralistak dira"

Irabazik, berriz, uste du aurrekontuak erabat  kolapsatuta daudela eta erdiguneko parkinga moduko proiektuekin mugikortasun arloan 20 urte egingo dela atzera. Horregatik erabili zuen Pontevedrako adibidea, mugikortasun aldetik jaso dituen askotariko errekonozimenduak. Horrekin batera, aurrekontu elektoralistak direla uste dute.

Zubietako bizilagunak soluzio eske

Bestalde, Zubieta kaleko bizilagunen haserrea protagonista izan zen, beste behin, osoko bilkuran. Arrisku egoera etengabean daudela diote eta soluzioak eskatu zituzten. Alkateak, aldi berean parkingerako Ibargarai eta Zubieta altxatzea ezinezkoa izango dela esateaz gain, oposizioarekin batera aurrera begirako lehentasunak finkatuko dituztela adierazi zuen.

Erlazionatuak

Udal aurrekontua onartzeko osoko bilkura argazkitan

Bergara

Lehen aldiz urtea bukatu aurretik onartu da udal aurrekontua Bergaran. Jarraian, urteko azken osoko bilkurako une esanguratsuenak.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.