Bergarako Udalak bergararren arreta zerbitzua delako bulegoa martxan jartzeko lanean dihardu. Bulego fisikoa otsailerako egongo da zabalik; aldiz, bulego elektronikoa izango dena erabilgarri dago gaurtik aurrera.
B@Z zabaltzen dutenean, herritarrek leiho bakarrean egin ahal izango dituzte tramite guztiak, era autonomo batean.
Eskuliburu batean estandarizatu dituzte tramiteak
Urtebeteko lanketa egin dute udaletxe barruan; hala, herritarrei zuzenduta egiten dituzten tramite guztiak eskuliburu batean jaso dituzte.
Otsailean zabalduko duten bulego fisikoan lau langile egongo dira; egun udaleko langileak direnak. Alkateak azaldu du "eskarmentua" duten langileak nahi zituztela B@Z-erako.
Bulego telematikoan nola identifikatu
Arreta zerbitzuaren barruan egongo da gaur zabaldu duten bulego telematikoa. Makina baten bitartez herritarrek hainbat tramite egiteko aukera izango dute. Gaur egun web orrialdean egin daitezkeen kexak, iradokizunak, argazkiak bidaltzea… horiek egiteko aukera eskainiko du. Bestalde, DNI-arekin norberaren errolda agiria ateratzeko aukera egongo da. Beste tramite batzuk Izenpe txartelarekin edo DNI elektronikoarekin egin ahal izango dira: ordainagiriak eskuratu, isunak ikusi...
Bulego elektronikoa egunero egongo da zabalik 6:00etatik 22:00etara, Udaltzainek udaletxean zabalik duten tartean
Edonork erabiltzeko moduko makina dela azaldu dute eta irisgarritasuna bermatuta dagoela. Bulego elektronikoa egunero egongo da zabalik 6:00etatik 22:00etara, Udaltzainek udaletxean zabalik duten tartean.
Bulego elektronikoan txartelarekin bakarrik egin daitezke ordainketak; bada, eskaintza zabaltzeko, beste makina bat jarri dute alboan txartelarekin eta diru fisikoarekin ordaindu ahal izateko.